Şairin səsi
M. Müşfiqə
Axşamdan bəridir könlümdə yenə
Hirsli fırtınalar, qasırğalar var.
Çox da uymayıram könlüm deyənə,
Gözlərim hər şeydə bir hikmət arar.
İçim dalğalanır, sanki bir dəniz,
Mən bu dalğalarla qucaqlaşıram.
Nələr düşünürəm duya bilsəniz,
Sanki varlığımdan uzaqlaşıram.
Bəzən də fikrimin qanadlarını,
Küləklər qoparır qaldırır guya
Sürərəm əsrimin qır atlarını
Bu axın başqa bir axındır deyə
Bütün arzularım gülür yarına (sabaha)
Xəyaldan ilhamlar almamaq üçün
Baxıram Leninin kitablarına
Dəstənin dalında qalmamaq üçün…
1930
