Həyat düşüncələri
Sən elə bilmə ki, köçdüyüm zaman
Dünyadan biryolluq köçəcəyəm mən.
Bir dəfə ölüncə
Bəlkə min dəfə
Ölümü tapdayıb keçəcəyəm mən.
Bir gün öz yanında görməsən məni
Çıx yaşıl bağlara quşları dinlə.
Okean qüdrətli Araz nehrini
Saxlamaq istəyən daşları dinlə!
Dinlə küləkləri, küləklərdəyəm!
Ürəklərdən soruş, ürəklərdəyəm!
Bütün ulduzlarda, bütün çaylarda,
Bütün güllərdəyəm, çiçəklərdəyəm!
Buludu şimşəklə paralayaraq,
Zülməti nur ilə boğacağam mən.
Qərbdə ulduz kimi batsam,
Şərqə bax:
Şərqdən günəş kimi doğacağam mən!
Qanadlanacağam sənin yanına
Qışla əlbəyaxa ilk bahar ilə.
Savalan dağının zirvələrindən
Qərbə, Şərqə düşən şüalar ilə!
İtib batmaq üçün yaranmamışam.
Dünənəm!
Bu günəm!
Gələcəyəm mən!
Bir gün bu dünyadan getsəm də nə qəm,
Dünyaya təzədən gələcəyəm mən!
1961
