Türk ədəbiyyatının ən unudulmaz şairi Turqut Uyar (1927-1985) İkinci Yeni axımı (cərəyanı) şairlərindəndir. “Ərzi hal”, “Türkiyəm”, “Dünyanın ən gözəl Ərəbistanı”, “Hər bazar ertəsi”, “Divan”, “Toplandılar” adlı şeirlər kitablarının müəllifidir.Turqut Uyar yaradıcılığının ilk dövründə şeirlə yanaşı roman yazmağa başlamış, ancaq Alen Förnierin “Adsız ölkə” və Fyodor Dostoyevskinin romanlarını oxuduqdan sonra roman yazmaqdan əl çəkmişdir.
***
AXŞAMÜSTÜ YUXUSU
İndi gəmilər keçər uzaqlardan
Könlüm göyərtədə sərələnibdir.
İşıqlı gecələr, çalğı səsi, pendir-çörək
Nə biletim, nə pulum, nə də dostum var
Uçunur ürəyim hey boylandıqca…
-Oyan Turqutum, qəribim, oyan, bura Termədir.
Termə körpüsündən maşınlar keçir,
Orda-burada üç-üç beş-beş danışırlar işçilər.
Bir gecə başlayır, yarı qara, yarı qırmızı
Siqaretmi yandırıb evimə qayıdıram…
-Gedin gəmilər
Vardığınız yerlərə bir salam deyin
Gün olar bütün dərdlərimdən uzaq
Mən də gələrəm…
***
QURTULMAQ BÜTÜN DƏRDLƏRDƏN
Sularla axmaq bir gün bir gün bir gün
Bir gün dağlara çıxmaq bir-bir bir-bir dağlara çıxmaq bir gün
Çıxmaq çıxmaq bir-bir bir-bir bir gün dağlara dağlara bir gün
Bir gün bir-bir bir-bir bir dağlara
Ah uca dağlara bir gün
Ey bir gün
Çiçək açmaq bir gün
Dağlara dağlara bir-bir bir-bir bir dağlara
Otları böyütmək bir gün
Bir gün kəndlər kəndlər yuyulmuş damlar geri dönmək bir gün
Bir gün yeni dönmək
Bir gün dağlara çıxmaq bir-bir bir-bir bir çıxmaq çıxmaq
Su getmək günəş bilmək
Yenidən orda otlarda orda yenidən orda orda
Yorğun bir gül tapmaq və geri dönənlər bir gün
Ey yorğun atlar, saymaq bilməyən uşaqlar
Ey bütün hazır geyimçilər ey,
Bir gün olmaq, küskün keşişlərdən olmamaq bir gün
Dağlara dağlara çıxmaq sular körpülər sular bir gün çıxmaq
Əski qaba maşınlardan düşüb bir gün çıxmaq
Dağlara dağlara dağlara başqa heç
Bir gün dağlara.
Şeirləri iklim.az dilimizə uyğunlaşdırdı
