2020-Cİ İL ƏDƏBİYYAT NOBEL MÜKAFATI ŞAİR LUİZA QLÜKƏ VERİLDİ
2020-ci il Nobel ədəbiyyat mükafatını şair Luiza Qlük aldı. O, 27 ildən sonra Nobel mükafatı qazanan ilk ABŞ qadın yazarı, dünya üzrə isə bu mükafatı qazanan 16-cı qadın yazar oldu.Mükafata əlavə olaraq 77 yaşlı müəllifə 10 milyon İsveç kronu (1,1 milyon dollar) hədiyyə veriləcək.
İsveç Akademiyasının açıqlamasına görə, Qlük bu mükafatı, ” fərdi varlığı sadə bir gözəlliklə bəşəriliyə yüksəldən sarsılmaz poetik səsinə” görə, eləcə də “Aydınlıq axtarışı ilə formalaşdırdığı əsərlərində uşaqlıq, ailə həyatı, valideynlər və bacı-qardaşlar arasındakı münasibətlərdən bəhs etdiyi və bunları əsərlərinin əsas mövzusuna çevirdiyinə” görə almışdır.
İlk kitabı “İlk doğulan” 1968-ci ildə nəşr edilən Qlük, Amerika ədəbiyyatının ən önəmli şairlərindən biridir.
Tənqidçilər onun öz əsərlərində ağrı, travma, istək və təbiətin insan ruhunu saflaşdırdığını təsvir etməklə, kədərin və yalnızlığın səmimi dilini yaratdığını deyirlər. Şeirdəki uğurunu isə öz həyat hekayəsi ilə mifologiya arasında əlaqə qurmasında görürlər.
