Azərbaycan Respublikasının Prezidenti İlham Əliyevin, Ermənistanın baş naziri Nikol Paşinyanın və Rusiya Federasiyasının Prezidenti Vladimir Putinin noyabrın 10-da imzaladıqları bəyanatın 6-cı bəndinə əsasən Ermənistan işğal etdiyi Kəlbəcər rayonunu bu gün Azərbaycana qaytarır.
Ermənistan silahlı qüvvələri Kəlbəcər rayonunu 1993-cü il aprelin 2-də işğal etmişdi. İşğal nəticəsində 53 340 nəfər öz yurdundan didərgin düşmüş, 55 hərbçi, 511 sakin öldürülmüş, 321 nəfər əsir götürülmüş və itkin düşmüş, minlərlə sakin yaralanmışdı. Kəlbəcərin 71 000-dən çox əhalisi məcburi köçkün kimi bu gün Azərbaycanın müxtəlif yaşayış məntəqələrində məskunlaşıb.
Noyabrın 10-da Azərbaycan, Rusiya dövlət başçılarının və Ermənistanın baş nazirinin imzaladıqları sazişə əsasən Kəlbəcər bu gün Azərbaycana qaytarılır. Orada olan xarici medya bildirir ki, ermənilər Kəlbəcəri artıq tərk ediblər. Azərbaycanlılara qalmasın deyə bir çox erməni evlərə od vurublar. Döyüş meydanında silah-sursatını qoyub qaçan erməni Kəlbəcərdə aparılması mümkün olan hər şeyi götürür, qalanı isə yararsız hala gətirir. Ağacları kəsir, evlərin qapı-pəncərəsini qırır, uçurur. Düşmən, hətta işğal olunmuş ərazilərimizdəki maddi-mədəni sərvətlərimizi qarət edir, aparır, ya da məhv edir.
Ermənilərin Kəlbəcəri tərk etmə müddəti noyabrın 25-ə qədər uzadıldı.
İklim.az
