Bir sabah ayılırsan ki, dünya başqa bir ab-havadadır. Hətta ayılanda görürsən ki, hələ sabah belə deyil. Gecədən düşmən hücum edib və bizim igidlər də ona layiqli cavab veriblər. O andan bütün xalq bir ürək kimi eyni ahənglə nəfəs aldı. Hamı düşmənə nifrət edərək vətəni müdafiəyə qalxdı. Döyüşə gedən oğlanlar toya bayrama gedər kimi ürəklə gedirdilər.
Çox vaxt “indiki cavanlar…” sözüylə başlayan narazılıq cümlələri deyirdilər gənclərin ünvanına. İndi bir anda o gənclər aslana çevrildilər, “papaq altda oğullar var” deyimi gerçək oldu. Bir yumruq kimi birləşib düşmənin başına endi.
İki il əvvəl beləcə həyəcanla oyandıq və qələbə qazandıq. Üç minə yaxın igidimiz şəhid oldu, Qarabağ Azərbaycan oldu. Oğul verib torpaq aldıq. Torpaq bir başqa doğmalaşdı. İndi o torpaqda ölümsüzlər uyuyur. İndi biz ürəklə qəhrəman xalqıq deyirik, həm də məhz o igidlərin hesabına.
O igidlər indi yaşaya bilərdilər, hamımız kimi həyat sürərdilər. Amma onlar qəhrəmanlığı seçdilər , fərqləndilər, bizdən ucaldılar.
44 gün hər kəs oyaq oldu, gözümüz qulağımız cəbhədə, ürəyimiz səksəkədə, dilimiz duada idi. 44 günlük Vətən müharibəsi dövründə Ali Baş Komandan İlham Əliyev müntəzəm xalqa müraciətlər edirdi. Biz ondan xoş müjdəli xəbərlər aılmağa alışdıq, bu xəbərlərlə xoşbəxt olduq. Bir yandan da ürəyimiz dağlandı şəhid xəbərləri ilə. Amma hər kəs bilirdi ki, can verməlidir. Hər kəs bir sıra nəfəri idi qələbə yolunda. İlk qələbəmiz elə sentyabrın 27-də düşmənin ilk hücumuna verilən cavabdan bəlli idi. Alınan hər qarış torpaq xalqda böyük coşqunluq yaradırdı.
Xalq ruhlandı, igidlər atlandı və düşmən ermənini məhv etdi. Dəmir yumruq əməliyyatı uğurlu oldu, Ali baş komandan ətrafında bir yumruq olub düşmən başına endi.Bəli igidlərimiz şəhid oldu, torpağımız mənalandı.
Biz bu günü böyük bir hörmətlə, sevgiylə şəhidlərimizi anırıq, unutmuruq və bu gün Vətən müharibəsindəki zəfərimizi onlara borclu olduğumuzu bilirik.Ruhunuz şad olsun, ölümsüzlər.
İklim.az
