ŞEİRLƏR
***
Uzun yoldan gələn var…
Fevral soyuğunda
qəlbi isidən sarı xatirələri
bir nəfəsdə silən var…
dəstəyində hər çırpılan qapının
izi qalmaz gedənin…
uşaq deyil hər çərpələng uçuran…
Köhnə şəkillərə danışırıq dərdimizi,
“bütün dövrlərin romanları”nda
axtarırıq həmdərdimizi,
Yüz heyf,
Ürəyiyumşaq deyil tanımadığımız hər romançı…
Biz belə itiririk güzgülərə güvənməyi…
Biz belə qazanırıq daşlara könül verməyi…
Axtarırıq oxuduğumuz hər kitabda:
“sevdiyini necə öldürməli içində?”
…Bir gün bacaracağıq “qatil” olmağı…
…Gün gələcək,
“böyüdülər” deyəcəklər bizə də…
O gün gələcək…
O gün;
“Gül rəngi dünyaya gülümsəyəndə…”
“Yorğan davası bitəndə…”
“Dağlı qızı gönü suya verib geri dönəndə…”
O gün gələcək…
(2020)
***
Adamlar ağaclara,
Adamlar buludlara
döndülər ürəyimdə…
Ümid asdım budaqlardan,
Şeir yazdım…
Uzaqlardan
Gözümə gözəl dəydilər…
Qaçdım…
Qaçdım adama tərəf…
Qaçdım ağaca tərəf…
Bar vermədi budaqlar…
Budaqları soyuq-soyuq
Baxışlarla əydilər…
Budaqları qırıb-qırıb;
Ürəyimə dəydilər…
Asdım…
“O”nu asdım budaqlardan…
“Mən”i asdım budaqlardan…
Buludları hayladım,
Buludlara ağladım…
Buludlar rəng dəyişdi,
Hər fəsillə əyişdi,
Bircə ovuc yağmadı…
Mənimlə ağlamadı…
…döndülər ürəyimdə
Ağaclara adamlar…
Buludlara adamlar…
Kimini xəzan vurdu,
Kimini fəsil yordu,
Bir gün də yox oldular…
Bir gün də yox oldular…
***
…Tellərimin ağrıyan,
Mənim ölən yerimsən…
Ulduzları sayıram
-milyonlardan birimsən…
Bu ağrıyan telimdən
Üç seçib-bir ayırıb
Ulduzlara göndərsəm,
Divin ayaq izindən
Bir tutam qar ayırıb
İzlərinə üfürsəm
Nağıl olarmı, görən?
…şeir olarmı, görən?
…bu qış gecəsində
Nağılım-noğulum ol…
Laylamın hecasında
Nur payım-oğulum ol…
Qızıma bəxt düzəldim-
Qarda bir beşik çəkim…
…əhd edim, qar ərisin,
Dərdimə ümid əkim…
Bu yaz döyüm qapını,
Deyim ki:
-Bax, gəlmişəm…
Gözümdə beşik şəkli,
Dilimdə “ah”…
Gəlmişəm…
Bir bayatı çək mənə…
Bir şeir də mən qoşum…
Nənəmin adın söylə,
Yaddaşımda cüt qoşum;
Xatirələr ələnib,
Urasında ümidim
Taleyə əsir qalıb…
…yenə yada düşmüsən…
Yəhərləyib həsrətin
Qara köhlən atını
Sənlə keçən hər günün
Sorağına düşmüşəm…
Xatirə xurcunumun
Naxışlı saçağında
Saçın ucun hörməyə
Bir salxımlıq yer qalıb…
Neynim… bu da taledi…
Dərdimin yaddaşında
nənəmdən bir bayatı,
Səndən bir şeir qalıb…
2021
***
Ətəyimə daş yığmışam
Getdiyin yolun ağzından…
Özümü daşa qatmışam,
Keçib xoş günün azından…
Axtara-axtara gəlib
Ömrün qışına çatmışam…
Gölməçələrdə göllənib
palçıqdan “sən” yaratmışam…
tikdiyim donun düyməsiz,
ümiddən ilgək qoymuşam…
ömürdü…
öysüz-öyməsiz;
adını “gerçək” qoymuşam…
Ağrı…
Payız…
Dərman…
Şəki…
…Saçın sayır iki dəli…
…Yaman gülür güzgüdəki:
-Hardasan, ay Şəfa Vəli?
2021
