Babam Qorqud yazan Kitabdı Vətən
Nəgməsi xalqımın dilində qalıb.
Açılıbdı cildi Araz boyunca
İki oxucunun əlində qalıb.
.
Tikanlı məftillər kəsib aranı,
Haraya baxıram sərhəd görünür.
Bu tayda ağbircək analar durub,
O tayda Ağ saclı Səhənd görünür.
.
Gözümü dikmişəm kükrəyən caya,
Nisgilim qəlbimi didir, yandırır.
Suların qoynunda bir azman qaya
Vətən balasını mənə andırır.
.
Bu taydan o taya kecirmiş bir vaxt
Köksündə yurdunun sevgi düyünü.
Yolun yarısında elə sularda
Eşidib torpağın bölündüyünü.
.
Hər taydan bir qardaş səsləyib onu,
Harayı gözündə yaşa dönübdü.
Haraya bilməyib tutsun yönünü,
Suların qoynunda daşa dönübdü.
.
Babam Qorqud yazan kitabdı Vətən,
Nəğməsi xalqımın dilində qalıb.
Açılıbdı cildi Araz boyunca
İki oxucunun əlində qalıb.
