***
Ey əsgər
Ey savaş meydanında bayraq daşıyan əsgər!
O, vətəndir əlindəki!
O, “Amin”dir dilindəki!
O, inamdır könlündəki!
O, sevgidir qəlbindəki!
Başın üstdə saxladığın…
O, adi bir bayraq deyil!
Əlində tutduğun nədir,
bilirsənmi?!
Vətənimin şərəfidir,
Torpağımın qeyrətidir,
Ay-ulduzlu şanlı bayraq
Babaların məşəqqətlə
Bir heçlikdən var etdiyi
Əmanətdir.
Gözün kimi qoru onu!
Şəhidlərin bu torpağa
Sədaqəti,
Körpələrin sabahıdır.
İgidlərin vüqarıdır!
Dövlətimin qüdrətidir
Aydın səmada vüqarla
Dalğalanması.
Bayrağım sancılan məkan –
Görgahımdır, məskənimdir,
Adi qara torpaq deyil.
Bir şəhidin məzar daşı,
Bir əsgərin qürur yeri
Bayraq sancılan torpaq.
And yeridir, yurd yeridir,
Cəng meydanı, qəbr evidir.
Ağdamlısan, şuşalısan, laçın, cəbrayıllısan
Hər yerlisən, hər yanlısan,
Vətən oğlu!
Vətən sənə oğul deyib,
Sən də ona oğul oldun,
“Mamır olub,
qayasında bitər” oldun,
Torpağıma öz canınla sipər oldun.
Düşmənimin gözlərinə ox olub batar oldun,
Öz yurdunu qorumağa çəpər oldun…
Ey bayraq yolunda canını verən əsgər!
Bayrağı canından əziz sanmısan,
Uğrunda sevərək şəhid olmusan,
Vətən basılmasın, torpaq azalmasın,
Şərəf tapdanmasın, demisən.
“Bir kərə yüksələn bayraq
Bir daha enməsin”, demisən!
Son nəfəsdə son kəlmən: “ana”,
Gözünə əksi hopan bir də bayraq olubdur.
Ey savaş meydanında
Şərəflə Bayraq daşıyan
Uğrunda can verən əsgər!
******
Məni niyə sevəsən, Vətən?
Nə bir daşın olammadım,
Nə torpağın olammadım,
Ağac başında qalan
Dərddən saralıb-solan
Yarpağın olammadım,
Məni niyə sevəsən, Vətən?!
Bağ-bağatın olammadım,
Axırda bağlı qalan
Qıratdan qanad alan
Köhlən atın olammadım.
Məni niyə sevəsən, Vətən?!
Axan çayın olammadım,
Gur bulağın olammadım,
Uzanıb dilsiz-ağızsız
kənd-kəsəyə aparan
yolun-yolağın olammadım,
Məni niyə sevəsən, Vətən?!
Barlı meşən olammadım,
Güllü talan olammadım,
Kol dibində üşüyən
Ətri vətəni bürüyən
Bənövşən olammadım,
Məni niyə sevəsən, Vətən?!
Fazilin olammadım,
Şirinin olammadım,
Səni candan çox sevən
Mübariz olammadım.
İçində sən qövr edən
Eləcə Gülyaz oldum,
Məni niyə sevəsən, Vətən?!
***
Gərək olsa…
Dağları yıxa bilərəm,
Göylərə çıxa bilərəm,
Buludu sıxa bilərəm,
Sənə yağış gərək olsa…
Çay kimi axa bilərəm,
Şimşəktək çaxa bilırəm,
Zülmətdə baxa bilərəm
Sənə baxış gərək olsa …
Kədərin bağrın sökərəm,
Yollarına gül əkərəm,
Rəssam tək şəkil çəkərəm,
Sənə naxış gərək olsa.
Ömrüm hədər getməz boşa,
Sənlə gəzərsəm qoşa,
Çıxaram dağlara-daşa,
Sənə yoxuş gərək olsa.
Gülyazam, gül tək açaram,
Günəş kimi nur saçaram,
Dualarla dil açaram,
Sənə alqış gərək olsa.
