Etibarlı insan | iklim.az

WhatsApp Image 2025-07-03 at 15.40.23 (1)

Bilənlər yaxşı bilir, bilməyənlərə də bilənlər deyib və onlar da yaxşı bilirlər ki, ad günü təbriki yazmaq mənim üçün çox çətindir. Bilənlər bilir, bilməyənlər də bilsin ki, bu məsələdə məni klassik xəsis obrazları ilə müqayisə edə bilərsiniz. Amma yenə də ürəyimdən təbrik yazmaq keçir.

Sima xanım çox güclü insandır. Onu 2018-ci ildə “orfoqrafiya müharibəsi” zamanı tanıdım və bu tanışlığımız get-gedə məsləkdaşlığa, eyni qurumda ortaqlığa çevrildi. Hər zaman demişəm və həyat da bunu sübut edib: insanın xarakterinin hətta özünə belə məlum olmayan bir çox detalları ekstremal situasiyalarda üzə çıxır. O, insanın həm güclü, təqdirəlayiq, başqalarında qibtə, hətta paxıllıq doğura bilən; həm də zəif, mənfi, başqalarında təəccüb və təəssüf doğuran tərəflərini üzə çıxarır… İndi gələk mətləbə. Bunları niyə xatırlatdım? Sima xanım FADMM-in baş məsləhətçisi olduğu müddətdə mətbuatda, sosial şəbəkələrdə dəfələrlə ekstremal situasiyalarla üzləşib. Amma heç zaman təmkinini pozmayıb.

2021-ci ildə FADMM-in xaricdə yaşayan soydaşlarımızla bağlı bir layihəsi var idi. Layihə çərçivəsində soydaşlarımızın ana dilindən istifadəsi, onun tədrisi və təşviqi istiqamətində imkanlarını öyrənir, prolemlərinin həllinə çalışırdıq. Bu, FADMM-in bütün dünya azərbaycanlılarını vahid ədəbi dil, leksika, qrammatika, orfoqrafiya… ətrafında birləşdirmək səylərinin bir hissəsi idi. Bu məsələdə də Sima xanım öz imkanlarını səfərbər etdi, xaricdə yaşayan soydaşlarımızla FADMM üzvlərinin əməkdaşlığına nail oldu.

Sima Cəfərova sözü üzə deyəndir, fəaldır, çalışqandır, tapşırılan işə məsuliyyətlə yanaşandır, FADMM-in yorulmaz üzvlərindəndir, harada çətinlik var, oraya gedir. Ən əsası, ən mühümü odur ki, (buna insanları dəyərləndirəndə çox diqqət ayırıram) etibarlı bir insandır. Sima xanım Cəfərova FADMM-in yarandığı ilk gündən indiyədək onun baş məsləhətçisidir. O hər zaman öz punktuallığı, işə ürəkdən yanaşması ilə seçilib. Bütün bunlarla yanaşı, həm də ovxarlı klaviatura sahibidir. Füzuli “Can sözdür, əgər bilürsə insan, Sözdür ki, deyirlər özgədir can” deyirdi. Sima xanım Cəfərova deyir: “Söz tarixdir, mədəniyyətdir, abidədir, birlikdir, sədaqətdir, eşqdir, ədəbiyyatdır, ünvandır, ürək sərinlədən bir bulaqdır.Söz həsrətimizin ifadəçisidir. Söz xatirələrimizin yaddaşıdır. Söz yoxdursa, insanın nə əvvəlindən xəbəri olar, nə gələcəyini stimullaşdıra bilər. İnsan, varlıq sözlə ifadə olunur. İnsan öz tarixini daşlar üzərinə sözlə yazdı”.

Onun sözə, onun dəqiq və düzgün, yerində işlədilməsinə nə qədər dəyər verdiyini məqalələrində də müşahidə etmişik, xüsusi diqqət ayırdığı saytların monitorinqi üzrə paylaşmaları zamanı da görmüşük. Sima xanım üçün həm də “Söz – ünvandır. Qoruyub saxlaya bildiyimiz dil millətimizin, xalqımızın, dövlətimizin ünvanıdır… Bu ünvanın saflığını qorumaq, onu gələcək nəsillərə ötürmək bu gün hər bir azərbaycanlının borcudur”.

Sözün özünü bir dünya sanan və söz dünyasını açmağın elə də asan iş olmadığımı deyən Sima xanımla biz FADMM-dəki birgə fəaliyyətdən başqa, birlikdə “Gürcüstan’dan Azerbaycan’a ağız sözlüyü” adlı dialektoloji kitabın ərsəyə gəlməsində də əməkdaşlıq etmişik. Türkdilli xalqlar arasında ilk müqayisəli dialektoloji lüğətin tərtibi zamanı bir daha əmin olduq ki, Sima xanım həm də Azərbaycan dilinin dialektərinə dərindən bələddir və Qərb zonası dialektlərində işlənən bir çox sözlərin məna qatlarının açılmasında bunun mühüm rolu oldu.

Sima xanım, həmişə belə olun, sükanı belə saxlayın. Sizə cansağlığı və işlərinizdə uğurlar arzu edirik.

VASİF SADIQLI