Mir Sədi Mirlər: Zamanın məkanı kimdir

ŞEİRLƏR

Sevənlərin qədərdir

.

Qızım,döymə qapını,

Usdufca içəri keç.

Çox da babanam demə,

Bil,yolçu köçəri, keç.

.

Bu necə poçtalyon,

Xəbər üstə xəbər var.

Hər xəbərin içində,

Ölüm adlı əsər var.

.

Döy başıma-başıma,

Başımın içi səsdir.

Hər səsin son nəğməsi,

Ölüm adlı nəfəsdir.

.

Qapını heç bağlama,

Hardan gələr, bilinməz.

Qəlbini də dağlama,

Gələn zaman görünməz.

.

Sevdiklərin imtahan,

Sevənlərin qədərdir.

Yaşa,yaşaya bilsən,

Daşı,daşı bu dərdi.

.

Dərddə ki, batman-batman,

Cana hopar sis kimi.

Ölüm ruhun qoxusu,

Gələr qəlbə hiss kimi.

.

Bu dünyaya bir nəfəs,

Min cür həvəs eyləmə.

Döymə qapını,qızım,

Sən Allah səs eyləmə.

.

***

Zamanın məkanı kimdir

.

Boylandım, boylandım əlim qaşımda,

Boylandım, boylandım sevda başımda.

Turan çöllərinin yovşan qoxusu,

Zülmət gecələrin sürgün qorxusu.

Bütün sevdalarım uçur sonsuza,

Bütün xəyalların sonu nağıldır.

Zaman qamçısını fələklə vurar,

Bir də görərsən ki, həyat dağıldı.

Kim bilir harada dayanar zaman,

Kim bilir zamanın məkanı kimdir.

Gülünc bir arzudur bütün qədərin,

Yenə də baxarsan zaman hakimdir.