Toğrul Azər oğlu Zamanlı 2001-ci ildə Mingəçevir şəhərində anadan olub. Kəlbəcər rayon tam orta məktəbində təhsil alıb. Mingəçevir Dövlət Universitetinin məzunudur, tarixçidir. O böyük şəxsi kitabxanaya və geniş dünyagörüşünə sahibdir. Türkçülük və Bütöv Azərbaycan ideologiyalarına, tarixi ədəbiyyata daha böyük maraq göstərir. Onun ilk şeir təcrübəsini sizə təqdim edirik.Yaradıcılıq yolu uğurlu olsun.
***
Uşaqlıq ömrümün gözəl çağıdır
Gözün həm qarası, həm də ağıdır.
Bir güllü çiçəkli vüqar dağıdır
Öz payı var ömrümdəki hər çağın,
Fəlsəfi bir dünyası var uşağın.
.
Olmasa da onlar hələ bir bitkin.
Fikri, düşüncəsi deyilsə yetişkin.
Hələ olmasa da ağlı çox dərin,
Kal barını dərmə heç vaxt bir bağın.
Fəlsəfi bir dünyası var uşağın.
.
Yağlı danışsa da qaralı-ağlı,
Daha kar eyləmir nənə nağılı
Artıq böyüyübdü balaca ağlı
Bilir o haradır solu və sağı
Fəlsəfi bir dünyası var uşağın.
.
Daha o inanmır divə, xortdana,
Yetim İbrahimə, nə də Cırtdana.
Daha əl uzatmır uşaq qənddana.
Qapanıb qapısı şirnili bağın,
Fəlsəfi bir dünyası var uşağın.
.
Verilmir Qızıl inəyə alaf ot,
Onu əvəz edir indi Copilot.
Fikirlər avtomat, layihə pilot,
Uşaq özü seçir indi otağın.
Fəlsəfi bir dünyası var uşağın.
.
Uşaqlar, qoy, öz olmağı öyrənsin,
Daim doğru söz olmağı öyrənsin
İşıq saçan köz olmağı öyrənsin.
Dadını hiss etsin məsum saflığın,
Fəlsəfi bir dünyası var uşağın.
.
Əritsə də uşaq ürək yağını
Yaşayammır öz uşaqlıq çağını,
Çıxarıblar oxumağın ağını,
Öldürüblər uşaqlarda marağı.
Fəlsəfi bir dünyası var uşağın.
.
Azəroğlu bilir uşaq dərdini
Hər bir şəxsin görür özəl, fərdini,
Uşaq özü yaxşı bilir həddini,
Yeri qalmır tənənin ya qınağın,
Fəlsəfi bir dünyası var uşağın.
